¿Qué será lo que tendrá la música tradicional asturiana que llega tan adientro? Yo nun lo sé pero los de Tuenda, que s'axuntaron nesti discu pa pescudar nesta realidá intanxible, sábenlo muncho bien: cada cantar ye una puerta d'un laberintu inmensu, un laberintu de valles que se retuercen, de la montaña al mar, configurando'l rostru serenu d'un país. "Canto los cantares de la mio aldea", dicía Pío Baroja, "y ye como si tolos mios antepasaos se punxeren a acompañame na melodía ayudándome nel tresiegu del vivir".

Digo que cada cantar ye una puerta d'entrada, una invitación al viaxe a esa aldea colectiva, l'alcordanza, que ye tamién l'aldea del mundu y el llugar onde nos representamos como yéremos y como vamos ser. Digo que cada cantar ye un pasaxe a esi fondu nuesu, íntimu, y que sin embargo compartimos con otros amablemente: nada hai nel mundu más llibertariu, que tarreza más les fronteres, qu'un cantar. Va ún xiplándolu per ende y quién sabe en qué alcordanza va topar sosiegu.

Cuento que la xente de Tuenda ta acabante facer un furmosu trabayu. Un trabayu con xeitu, bien urdíu y cola conciencia de quien sabe que la llave y el secretu ta na llección de los árboles. L'espíritu humanu ye asina, como los carbayos: los raigaños palpitantes, precíos de sede, afuraquen la tierra hasta'l miesmu ciernu del ser, y, a la vez, el carbayu ascende hacia la lluz buscando una infinita altura. Al final, yá se sabe: tantes coses que ver per ende, que namorar; tantes coses que meter nel fardel escuru y luminosu de la memoria que ye, como nós, vagamunda y libérrima. Esa ye la xera: añedir un poco de lluz a la lluz del día; guardar, pal iviernu que vien, un poco de belleza nel horru del mundu.